प्रतिनिधी :वसई पश्चिमेतील पापडी तलाव येथील राम मंदिराच्या बाजूला तुटलेल्या दरवाजाखाली दबून ५ वर्षांच्या निष्पाप मुलीचा मृत्यू झाला. गेल्या अनेक दिवसांपासून हा तुटलेला फाटक तसाच निष्काळजीपणे ठेवला जात होता. पापडी तलावावर फेरफटका मारण्यासाठी आलेल्या मुलीच्या अंगावर फाटक पडून डोक्याला मार लागून झालेल्या अपघातात निरागस मुलीचा मृत्यू झाला. सदर प्रकरणी वसई पोलीस स्टेशनमध्ये अपघाती मृत्यू म्हणून पोलिसांनी नोंद केली असून पुढील तपास चालू आहे. याबाबतची अधिक माहिती अशी की, वसई विरार शहर महानगरपालिका प्रभाग समिती आय हद्दीत असलेल्या पापडी येथील सार्वजनिक तलावावर फिरण्यासाठी गेलेल्या कु. भूमिका मेहेर या ५ वर्षांच्या मुलीच्या अंगावर फाटक पडले. मुलीच्या डोक्यावर मार लागला होता. तिला उपचाराकरिता रुग्णालयात दाखल केले. तिथे डॉक्टरांनी मुलीला मृत घोषित केले. प्रस्तुत प्रतिनिधीने सदर प्रकरणी अधिक चौकशी केली असता सदर फाटक मागील काही काळापासून तुटलेले असल्याची माहिती मिळाली. महानगरपालिका अधिकाऱ्यांच्या बेजबाबदारपणामुळे निष्पाप मुलीला प्राण गमवावे लागले. तलावाच्या व बगीचाच्या देखभाली व दुरुस्तीचे ठेके महानगरपालिकेकडून दिले जातात. मात्र पापडी तलावाचा ठेका महानगरपालिकेने दिलेला नाही. सदर तलावाबाबत अजून एक बातमी समोर आली आहे. सदर तलावाच्या उद्घाटनाचा कार्यक्रम चालू असताना तलावाची भिंत कोसळली होती. या कामाचा ठेका मुकेश ब्रदर्स या कंपनीला देण्यात आला होता. निकृष्ट दर्जाचे बांधकाम केल्यामुळेच भिंत कोसळली होती. मात्र त्यावेळी महानगरपालिकेकडून सदर ठेकेदारावर कोणतीही कारवाई झाली नव्हती. कारवाई का झाली नाही? अर्थातच महानगरपालिका अधिकारी व ठेकेदार यांच्या अभद्र युतीमुळेच ठेकेदारावर कोणतीही कारवाई झाली नाही. पापडी तलाव हा वसईतील जुन्या तलावांपैकी एक आहे, त्याचे अनेकवेळा सुशोभीकरण व दुरुस्ती करण्यात आली आहे. परंतु देखभालीअभावी तलावाच्या आजूबाजूचे मोठे लोखंडी गेट तुटले आहेत मात्र याकडे पालिकेचे लक्ष नाही. महापालिकेच्या या बेफिकीर वृत्तीमुळे आज एवढी मोठी दुर्घटना घडली आणि एका निष्पाप मुलीचा मृत्यू झाला. या प्रकरणाची माहिती मिळताच पोलिसांनी घटनास्थळी पोहोचून परिस्थितीचा आढावा घेऊन पंचनामा करण्यासह इतर कार्यवाही केली असून मृत तरुणीचा मृतदेह शवविच्छेदनासाठी पाठवण्यात आला आहे.