नालासोपारा :- वसई विरारमध्ये बनावट नॉटरीचा सर्रास वापर मोठ्या प्रमाणात सुरू आहे. त्यामुळे सर्वसामान्य नागरिकांच्या फसवणुकीच्या घटनांमध्ये झपाट्याने वाढ होत आहे. सामान्य नागरिकांची फसवणूक होऊ नये म्हणून तुळींज पोलीस ठाण्याचे वरिष्ठ पोलीस निरीक्षक राजेंद्र कांबळे यांनी त्यांच्या हद्दीतील नॉटरी करणाऱ्यांना नोटीस बजावून बनावट नॉटरी करू नका असे सांगून यासोबतच कडक कारवाई करण्याच्या सूचनाही देण्यात आल्या आहेत.
नालासोपाऱ्यात सर्वाधिक नॉटरी करणारे आहेत, हे विशेष. बिल्डर आणि नॉटरी यांच्या संगनमताने गरीब जनतेची फसवणूक होत आहे. येथे एक सदनिकेची बनावट नॉटरीद्वारे चार जणांना विकला जातो. गेल्या पाच वर्षांत तुळींज पोलिस ठाण्यात अशाच प्रकारे दोनहून अधिक जणांची फसवणूक झाली आहे. यासोबतच पाचशेहून अधिक लोकांची तक्रार पत्रे पोलिसांना देण्यात आली आहेत.
मिळालेल्या माहितीनुसार, वसई विरारमध्ये बनावट नॉटरीची संख्या मोठी आहे. बिल्डर, दलालांच्या माध्यमातून येथे बनावट नोटरींचा धंदा जोरात सुरू आहे. त्यामुळे सर्वसामान्यांशी फसवणुकीच्या घटना वाढत आहेत. शुक्रवारी संध्याकाळी तुळींज पोलिस ठाण्याचे वरिष्ठ पोलीस निरीक्षक राजेंद्र कांबळे यांनी नॉटरी करणाऱ्यांना पोलिस ठाण्यात बोलावून नोटीसा बजावल्या आहेत. यासोबतच चाळीतील घरे, दुकाने, सदनिका विक्री व्यवहाराचे नवीन नॉटरी केल्यास कायदेशीर कारवाई केली जाईल, अशा कडक सूचनाही त्यांना दिल्या. तुळींज हद्दीत बनावट नॉटरीचा धंदा सुरू असल्याचे राजेंद्र कांबळे यांनी सांगितले. तर घराच्या विक्रीचे नोटरी करण्याचा अधिकार फक्त नोंदणी कार्यालयाला आहे. हे लोक पैशासाठी बनावट नोटरी तयार करून कोणाचीही फसवणूक करू शकतात.