वालीव प्रभागातील पाणीपुरवठा विभागावर भ्रष्टाचाराचे आरोप; व्हिडिओ व्हायरल झाल्यानंतर नागरिकांमध्ये संताप
वसई–विरार (प्रतिनिधी): वसई–विरार शहर महानगरपालिकेच्या वालीव प्रभागातील केलीचा पाडा, राजीवली, भोयदापाडा परिसरात नळ जोडणीसाठी बेकायदेशीर वसूली होत असल्याचे गंभीर आरोप समोर आले आहेत.
या संदर्भातील एक व्हिडिओ सोशल मीडियावर व्हायरल झाला असून, त्यामध्ये काही व्यक्ती १२ नळ जोडण्यांसाठी १२ लाख रुपये घेतल्याची कबुली देताना दिसत असल्याचा दावा स्थानिक नागरिकांनी केला आहे.
व्हिडिओ व्हायरल – नागरिकांच्या शंका वाढल्या
व्हिडिओमध्ये नळ जोडणी संदर्भातील आर्थिक व्यवहाराची चर्चा होताना दिसते, अशी चर्चा परिसरात रंगली आहे.
स्थानिक रहिवाशांनी सांगितले की —“एका नळासाठी तब्बल ९० हजार रुपये मागितले गेले.
आम्ही महापालिकेच्या पाणीपुरवठा विभागाकडे चौकशीसाठी गेलो असता, अधिकारी वारंवार टाळाटाळ करतात.”
नागरिकांच्या मते, पाणीपुरवठा विभागात भ्रष्टाचाराचे जाळे खोलवर रुजले आहे, आणि सामान्य नागरिकांना नियमित नळ जोडणी मिळवण्यासाठी अडथळ्यांचा सामना करावा लागत आहे.“पाणी हक्क आहे, लाच नाही!”या प्रकरणामुळे स्थानिकांमध्ये तीव्र नाराजी व्यक्त होत आहे.“पाणी हा प्रत्येक नागरिकाचा मूलभूत हक्क आहे.नळ जोडणी मिळवण्यासाठी पैसे मागणे म्हणजे नागरिकांच्या हक्काची गळचेपी आहे,”
असे एका स्थानिक रहिवाशाने सांगितले.या प्रकरणाची संपूर्ण आणि निष्पक्ष चौकशी करण्याची मागणी नागरिकांनी केली आहे.
त्यांनी वसई–विरार महानगरपालिकेचे आयुक्त, अतिरिक्त आयुक्त, तसेच पाणीपुरवठा विभागप्रमुख व संबंधित प्रभाग अधिकाऱ्यांकडे लेखी तक्रार दाखल करण्याची तयारी दर्शवली आहे.“जर खरोखरच व्हिडिओमधील व्यवहार सत्य असेल, तर संबंधितांवर भारतीय न्याय संहितेनुसार (BNS) कठोर कारवाई व्हावी.”
या प्रकरणाची सत्यता तपासून, जर कोणी दोषी आढळले तर त्यांच्यावर शिस्तभंगात्मक आणि फौजदारी कारवाई करण्याची मागणी होत आहे.
स्थानिक प्रशासनाने पारदर्शक चौकशी करून नागरिकांचा विश्वास परत मिळवणे अत्यंत आवश्यक आहे, अशी भावना व्यक्त केली जात आहे.
वालीव प्रभागातील केलीचा पाडा–राजीवली–भोयदापाडा परिसरातील नळ जोडणी प्रकरण आता वसई–विरारच्या पाणीपुरवठा व्यवस्थेवर प्रश्नचिन्ह निर्माण करत आहे.
“पाणी हक्क आहे — लाच नाही,” या घोषवाक्याखाली नागरिक आता भ्रष्टाचाराविरोधात आवाज उठवू लागले आहेत.