वसई, १३ ऑगस्ट २०२५ — वसई-विरार शहर महानगरपालिकेने अनधिकृत बांधकामांविरुद्ध कठोर भूमिका घेतली असून, नवघर-माणिकपूर प्रभागातील केटी व्हिजन मल्टीप्लेक्स शेजारील पंचाल नगर परिसरातील ९ अनधिकृत गाळ्यांवर कारवाई करून सुमारे ५,४०० चौ.फुट क्षेत्रफळाचे बांधकाम हटवण्यात आले.
ही कारवाई दिनांक १२ आणि १३ ऑगस्ट रोजी दोन दिवस चालली. मा. आयुक्त आणि मा. अतिरिक्त आयुक्त यांच्या आदेशानुसार, उपायुक्त अजित मुठे यांच्या मार्गदर्शनाखाली ही मोहीम पार पडली.
कारवाईत सहभागी अधिकारी व कर्मचारी
या मोहिमेत उपायुक्त अजित मुठे, अतिक्रमण विभाग प्रमुख प्रकाश सुतार, सी.यू.सी. विभागाचे कनिष्ठ अभियंता मयुरेश पाटील, अतिक्रमण विभागाचे कनिष्ठ अभियंता मयूर सातवे, म.सू.ब. तसेच अतिक्रमण विभागातील अनेक कर्मचारी उपस्थित होते.
महानगरपालिकेचा इशारा
महानगरपालिकेने स्पष्ट केले आहे की, शहरातील अनधिकृत बांधकामांवर नियमानुसार कारवाई सुरू राहील. नागरिकांनी परवानगी न घेता किंवा नियमांचे उल्लंघन करून बांधकाम केल्यास त्यावर त्वरित तोडक-फोड कारवाई करण्यात येईल.
या कारवाईमुळे पंचाल नगर परिसरातील नागरिकांमध्ये चर्चा रंगली असून, काहींनी महानगरपालिकेच्या या पावलाचे स्वागत केले आहे, तर काहींनी कठोर कारवाईमुळे व्यवसायावर परिणाम होणार असल्याची खंत व्यक्त केली आहे.