पत्रकार/सामाजिक कार्यकर्ता रुबिना मुल्ला यांना माहिती देण्यास महापालिकेची टाळाटाळ,लोकायुक्त कार्यालयाकडून संबंधितांवर कारवाई होणार ?
वसई (प्रतिनिधी) : वसई विरार महापालिकेच्या घन कचरा विभागात मोठ्या प्रमाणात भ्रष्टाचार होत असल्याचा आरोप पत्रकार/सामाजिक कार्यकर्ता रुबिना मुल्ला यांनी केला असून त्यांनी याबाबत महापालिकेच्या संबंधित विभागाकडे ठेका देण्यात आलेल्या ठेकेदारांच्या कामाची माहिती एका पत्राद्वारे मागितली असता सदर माहिती देण्यास महापालिका टाळाटाळ करीत असल्याने महापालिकेच्या वरिष्ठ अधिकाऱ्यांच्या संगनमताने घन कचरा विभागात भ्रष्टार सुरू असल्याचा संशय रुबिना मुल्ला यांनी व्यक्त केला आहे.त्यानुषंगाने वसई विरार महापालिका आयुक्तांच्या निर्देशानुसार घन कचरा विभागाने नेमून दिलेले ठेकेदार साई गणेश इंटरप्रायझेस,हेना इंटरप्रायझेस,अनंत इंटरप्रायझेस, उजाला इंटरप्रायझेस,रेनबो इंटरप्रायझेस,दिनेश संखे, मंदिप इंटरप्रायझेस,आर. बी इंटरप्रायझेस आदि ठेकेदार कंपन्यांना मनपाच्या वेगवेगळ्या झोनचा घन कचरा व्यवस्थापनाचा ठेका लाखो रुपयांत देण्यात आला आहे.याबाबत रुबिना मुल्ला यांच्या माहिती अधिकारानुसार वरील सर्व ठेकेदार त्यांच्या हजेरी दस्तावेजात मजुरांच्या नावाने ऑफिसच्या आणि घरातील व्यक्तींना ठेवून घन कचरा व्यवस्थापनाचे पैसे स्वतःच्या घश्यात घालत असल्याचा आरोप करण्यात आला असून या भ्रष्टाचाराबाबत रुबिना मुल्ला यांनी 16 जानेवारी रोजी २०१७ पासून वारंवार घन कचरा व्यवस्पथपानातील घोटाळ्याची माहिती मिळवण्यासाठी पत्रव्यवहार करून सदर कंपन्यांना देण्यात आलेल्या ठेकेदारांच्या कामाबाबतची माहिती मागवली होती.परंतु त्यावेळी मनपाचे सेवानिवृत सुकदेव दरवेशी व इतर सर्व विभागाचे जनमाहिती अधिकारी, केदारे , जितेंद्र नाईक, धुमाळ, गुंजाळकर आदींसह प्रथम अपिलीय अधिकारी नानासाहेब कामठे यांनी आपसात संगनमताने उडवा उडवीची उत्तरे देत वेळ मारून नेली.आणि त्यानंतरही रुबिना मुल्ला यांनी ठेक्याच्या माहितीसाठी वारंवार स्मरण पत्र देवूनही वसई विरार महापालिकेने त्यास आतापर्यंत केराची टोपलीच दाखवली आहे.तर याबाबत रुबिना मुल्ला यांनी महाराष्ट्र राज्याच्या लोकायुक्त आणि उप लोकायुक्त कार्यालयात तक्रार दाखल केली असता सदर कार्यालयातील कक्ष अधिकारी र. सु.साठे यांच्या लेखी पत्रानुसार रुबिना मुल्ला यांच्या तक्रारीची दखल घेण्यात आली असून रुबिना मुल्ला यांना माहिती देण्याचे आदेश ईमेल द्वारे कळवण्यात आले आहे.परंतु असे असतानाही मनपाचे वरील सर्व अधिकारी आपापसात संगनमताने रुबिना मुल्ला यांना घनकचरा ठेकेदारा संदर्भात माहिती देण्यास टाळाटाळ करीत आहेत.त्यामुळे याप्रकरणी संबंधितांवर अधिनियम कलम १९(८) क च्या तरतुदीनुसार शिस्तभंगाच्या कारवाईची आर्तहाक रुबिना मुल्ला यांनी प्रशासनास केली असून या संपूर्ण प्रकरणाची सखोल चौकशीसह लोकायुक्त कार्यालय संबंधित वसई विरार महापालिकेच्या अधिकाऱ्यांवर कारवाई करणार का ? वसई विरार महापालिका आयुक्त सदर प्रकरणाबाबत चौकशी करून संबंधितांवर कारवाईचे आदेश देणार का ? तसेच या भ्रष्टाचारात जनमाहिती अधिकारी व प्रथम अपिलीय अधिकारी सहभागी असल्यास त्यांच्यावर कारवाई होईल का ? याकडे समाजसेविका रुबिना मुल्ला यांचे लक्ष लागले असून त्यांच्याकडून न्यायाची मागणी होत आहे.