प्रतिनिधी
विरार – विरार पूर्व येथील कोपरी परिसरातील नित्यानंद धाम या चार मजली इमारतीचा काही भाग मंगळवारी रात्री आठच्या सुमारास कोसळला. या घटनेमुळे परिसरात भीती पसरली आहे.
विरार पूर्व कोपरी गावातील नित्यानंद नगर परिसरात अनेक अनधिकृत इमारती आहेत. या इमारतींपैकी 10 वर्षे जुन्या नित्यानंद धाम या चार मजली इमारतीचा टेरेस आणि व चौथ्या मजल्यावरील सज्जा रात्री आठच्या सुमारास कोसळला. या वेळी मोठा आवाज झाल्याने परिसरात भीतीचे वातावरण निर्माण झाले. कोसळलेला भाग इमारतीखालील दुचाकींवर कोसळला. परिणामी वाहनांचे नुकसान झाले. या घटनेत भूमी विनोद पाटील ही पाच वर्षांची मुलगी ढिगार्‍याखाली अडकल्याने तिचा मृत्यू झाला आहे.
दुर्घटना घडली त्या वेळी इमारतीच्या चौथ्या मजल्यावर 10 कुटुंब होती. चौथ्या मजल्यावरील भाग कोसळल्याने रहिवाशांना बाहेर पडण्यास अडथळा येत होता, मात्र अग्निशमन दल येण्याआधीच स्थानिक नागरिकांनी बचावकार्याला सुरुवात केली. दरम्यान, शेजारील इमारतसुद्धा कोसळण्याच्या स्थितीत असल्याने या इमारतीतील रहिवाशांनादेखील तातडीने मोकळ्या मैदानात धाव घेतली.