नालासोपारा :- वसईच्या श्रद्धाची तिच्याच प्रियकराने निर्घृण हत्या केल्याच्या हत्याकांडात नवनवीन सनसनाटी खुलासे होत आहेत. तिच्या शरीराचे ३५ तुकडे केली ही घटना अंगावर शहारे आणणारी आहे. तिच्या या जाण्याने सर्वात दुःख झाले ते तिच्या वडिलांना. आज तिने ऐकले असते तर ती आज जिवंत असती अशी खंत तिचे वडील विकास वालकर यांनी व्यक्त केली आहे. त्यावेळी तिला खूप समजावले. पण तिने ऐकले नाही. स्वतःचे निर्णय स्वतःच घेईल, असा हट्ट तिने केला होता. त्या दोघांच्या रिलेशनशिपबाबत कळल्यावर मी व माझ्या पत्नीने विरोध दर्शवून तू आमची मुलगी नसल्याचे तिला सांगितले होते. श्रद्धा घर सोडून जाताना तिच्या आईने खूप समजावले पण ती काहीही ऐकली नाही. तिच्या या निर्णयाचा आईला मोठा धक्का बसल्याने ती नेहमीच आजारी पडू लागली. २०२१ मध्ये आईचे निधन झाले.
श्रद्धाला व्हायचे होते पत्रकार
हत्या करण्यात आलेल्या श्रद्धाला पत्रकार व्हायचे होते आणि मास मीडियामध्ये ग्रॅज्युएशन केल्यानंतर ती थिएटरही करत होती. ती खूप सक्रिय होती आणि तिच्या व्यक्तिमत्त्वात एक स्पार्क होता असे तिच्या एका जवळच्या मित्राने सांगितले आहे.
भाडे ऍग्रीमेंटवर पती पत्नी म्हणून उल्लेख ?
सूत्रांकडून मिळालेल्या माहितीनुसार, एव्हरशाईन येथील ज्या इमारतीत ते दोघे भाड्याने राहत होते. त्या सदनिकेच्या भाडे ऍग्रीमेंटवर आफताब आणि श्रद्धा यांनी पती पत्नी म्हणून उल्लेख केल्याचे कळते.
आरोपी आफताबला दिल्ली पोलिसांनी नेले जंगलात
दिल्ली पोलीसांनी सोमवारी तपासासाठी आरोपी आफताब याला हत्येच्या सदनिकेत व जंगलात ज्या ठिकाणी अवयव फेकले त्याठिकाणी घेऊन आले होते. पोलिसांनी जंगलातून श्रद्धाच्या शरीराचे १० तुकडे हस्तगत केले आहे. तसेच गुन्हा करण्यासाठी वापरण्यात आलेला चाकूही जप्त केला आहे.
८ मे रोजी दिल्लीत दोघे झाले होते शिफ्ट
आफताब-श्रद्धा ८ मे रोजी दिल्लीत शिफ्ट झाले होते. येथील पहाडगंजचे हॉटेल व त्यानंतर दक्षिण दिल्लीत ते राहत होते. हत्या केल्यानंतरही आफताबने दुसऱ्या एका मुलीला डेट करून तिला या फ्लॅटवर घेऊन आल्याचे सूत्रांकडून कळते.
हत्येपूर्वी जंगलाजवळ घेतला फ्लॅट
दक्षिण दिल्लीनंतर आफताबने महरौलीच्या जंगलाजवळ फ्लॅट घेतला होता. या जंगलाजवळ फ्लॅट घेऊन देणाऱ्याला दिल्ली पोलिसांनी जेरबंद केले आहे. हत्या केसमध्ये बद्री नामक व्यक्तीची एंट्री झाली आहे. याच व्यक्तीने आफताबला महरौलीच्या भागात फ्लॅट घेऊन दिला होता. पोलिस आता त्याची चौकशी करत आहेत. याच फ्लॅटमधून आफताब मृतदेहाचे तुकडे फेकण्यासाठी जंगलात जात होता.