प्रतिनिधी : वसई विरार शहर महानगरपालिका प्रभाग समिती आय हद्दीत सागर शेत पेट्रोल पंपा नजिक केलेल्या अनधिकृत गाळ्यांच्या बांधकामावर कारवाई बाबत दिलेल्या तक्रारींवर सातत्याने पाठपुरावा करून कारवाई केली जात नसल्याबद्दल भारतीय जनता पार्टी वसई शहर सरचिटणीस अमित पवार यांनी आश्चर्य व्यक्त केले आहे. त्यांनी नव्याने आयुक्तांच्या नावे पत्र दिले आहे. सदर निवेदनात ३ मुद्दे समाविष्ट असून सदर मुद्यांच्या अनुषंगाने कारवाई करण्याची मागणी त्यांनी केली आहे.
वसई विरार शहर महानगरपालिका प्रभाग समिती आय हद्दीत सागर शेत पेट्रोल पंपा नजिक पेट्रोल पंप मालकाने अनधिकृत गाळ्यांचे बांधकाम केले आहे. सदर अनधिकृत गाळ्यांचे बांधकाम निष्कासित करून बांधकाम धारकांवर एमआरटीपी कायद्याने गुन्हे दाखल करण्याची मागणी त्यांनी केली आहे. त्यासाठी सातत्याने पाठपुरावा केला. मात्र प्रभाग समिती आय चे सहाय्यक आयुक्त प्रताप कोळी यांनी लाच खाऊन सदरच्या अनधिकृत बांधकामांना संरक्षण दिले आहे.
सदरच्या अनधिकृत बांधकाम प्रकरणी बांधकाम धारकाला बांधकाम परवानगी व जागेच्या मालकीबाबतची कागदपत्रे सादर करण्याकरिता दि. ५/४/२०२१ रोजी जावक क्र. वविशम /अ. बां. /वसई /०६/ २१-२२ नुसार नोटीस बजावण्यापलीकडे प्रभाग समिती आय कार्यालयाकडून कोणतीही कारवाई झालेली नाही. सदरची कागदपत्रे ७ दिवसात सादर करावयाची होती. कोणतीही कागदपत्रे सादर केलेली नाहीत. त्यामुळे महानगरपालिकेने पुढील कारवाई अर्थात निष्कासन व एमआरटीपी गुन्हे दाखल करण्याची कारवाई करायला हवी.
सदर बांधकाम प्रकरणी बांधकाम धारकाला एमआरटीपी नोटीस देतानाच विधी विभागामार्फत दिवाणी न्यायालयामध्ये केवेट दाखल करावे, जेणेकरून न्यायालयाकडून स्थगिती आदेश घेता येणार नाही. सदर अनधिकृत बांधकामाचा सर्वे नंबर विकासकाच्या नावासह महापालिकेच्या संकेत स्थळावर तसेच वृत्तपत्रांमध्ये प्रसिद्धी देऊन सदर बांधकामातील मालमत्ता कोणीही खरेदी करू नये असे आवाहन नागरिकांना करावे. तसेच सदर मालमत्तेतील खरेदी विक्री व्यवहार नोंदणी करू नयेत याकरिता दुय्यम निबंधक कार्यालयांमध्ये पत्रव्यवहार करावा, असे भारतीय जनता पार्टी वसई शहर सरचिटणीस अमित पवार यांनी आयुक्तांना दिलेल्या निवेदनात म्हटले आहे.
सदर तक्रारीच्या अनुषंगाने कारवाई न केल्यास संबंधित सर्व अधिकाऱ्यांविरुद्ध महाराष्ट्र शासनाच्या वरिष्ठ कार्यालयाकडे तक्रार केली जाईल, असा इशारा अमित पवार यांनी दिला आहे.