प्रतिनिधी :
वसई तालुक्यातील पोमण ग्राम पंचायत हद्दीतील पोमण सर्वे नंबर १८० हिस्सा नंबर १ या भूखंडावर असंख्य बांधकामे उभी असताना आणि सदरचा भूखंड बिनशेती करण्याबाबत हरकत नोंदविली असताना हरकत दुर्लक्षित करून नियमाला बगल देऊन सदरचा भूखंड बिनशेती करण्यात आलेला आहे. सदर प्रकरणी चौकशी करून योग्य ती कारवाई व्हावी.
भूखंड बिनशेती करताना सदर भूखंडावर कोणतेही बांधकाम असता कामा नये असा नियम असताना पोमण सर्वे नंबर १८० हिस्सा नंबर १ या भूखंडावर अनेक अनधिकृत बांधकामे आहेत. सदर भूखंडाचा बिनशेती आदेश मंजूर करण्यापूर्वी समाजसेवक मनोहर गुप्ता यांनी हरकत घेतली होती. त्यांनी सदर प्रकरणी मंडळ अधिकारी शशिकांत पडवळे यांची भेट ही घेतली होती. मात्र त्यांच्या हरकतीबाबत दखल न घेता सदर भूखंड बिनशेती करण्यात आला.
सदर प्रकरणी लाच लुचपत प्रतिबंधक खात्याकडून सखोल निष्पक्ष चौकशी करून कारवाई करावी. मोठी लाच खाऊन सदर भूखंड बिनशेती करण्यात आलेला आहे. तरी या प्रकरणातील दोषींवर कठोर कारवाई व्हावी.
