धर्मादाय रुग्णालयांच्या मुख्य फलकावर ‘धर्मादाय’ असा उल्लेख करावा;गरीब आणि गरजू रुग्णांसाठीच्या योजनांचे फलक दर्शनी भागात लावावे !

आरोग्य साहाय्य समितीचे मुंबई जिल्ह्यातील साहाय्यक धर्मादाय आयुक्तांना निवेदन सादर

मुंबई – धर्मादाय आयुक्तांनी राज्यातील धर्मादाय रुग्णालयांना त्यांच्या नावामध्ये अथवा नावासमोर ‘धर्मादाय अथवा चॅरिटेबल’ हा शब्द नमूद करण्यास, तसेच प्रसिद्ध करण्यासाठी आदेश दिले आहेत. याविषयी मुंबई, सोलापूर, सांगली, सातारा, कोल्हापूर, रत्नागिरी, सिंधुदुर्ग, जळगांव, नाशिक, नगर, नांदेड या जिल्ह्यांतील धर्मादाय रुग्णालयांना प्रत्यक्ष भेट देऊन पाहणी केली असता, काही रुग्णालयांकडून वरील आदेशानुसार कार्यवाही झाली नसल्याचे निदर्शनास आले आहे. तरी धर्मादाय रुग्णालयांच्या मुख्य फलकावर ‘धर्मादाय अथवा चॅरिटेबल’ असा उल्लेख करण्यात यावा अन् गरीब आणि गरजू रुग्णांसाठीच्या योजनांचे फलक दर्शनी भागात लावण्यात यावेत, या मागणीचे निवेदन आरोग्य साहाय्य समितीच्या वतीने मुंबई जिल्ह्यातील साहाय्यक धर्मादाय आयुक्त कार्यालयात देण्यात आले.

या निवेदनात पुढे म्हटले आहे, ‘जिल्ह्यातील रुग्णालयांच्या पहाणीच्या वेळी जिल्ह्यातील काही धर्मादाय रुग्णालयांनी गरीब आणि गरजू रुग्णांसाठी शासनाकडून वेळोवेळी लागू केलेल्या विविध योजनांची माहिती देणारे (धर्मादाय रुग्णालयात गरीब रुग्णांसाठी आरक्षित असलेल्या खाटांची संख्या, सवलतीच्या दरात मिळणार्‍या आरोग्य सुविधा इत्यादी) प्रसिद्धी फलक लावले नसल्याचे निदर्शनास आले आहे, तर काही ठिकाणी धर्मादाय असा उल्लेख असलेला फलक, तसेच गरीब गरजू रुग्णांना दिल्या जाणार्‍या सुविधांचा फलक दर्शनीय भागात लावलेला नाही.

या निवेदनाद्वारे मागण्या करण्यात आल्या की, जिल्ह्यातील सर्व धर्मादाय रुग्णालयांच्या नावामध्ये अथवा नावासमोर ‘धर्मादाय अथवा चॅरिटेबल’ असा उल्लेख करण्याविषयीची पूर्तता त्वरित व्हावी आणि त्याची पूर्तता झाल्याचा अहवाल आपल्या कार्यालयाकडे सादर करण्यासाठी ‘बाँबे पब्लिक ट्रस्ट ॲक्ट’च्या कलम 41‘अ’ आणि 41‘ड’ खाली आदेश देण्यात यावे. सदर रुग्णालये ही धर्मादाय रुग्णालय असून शासनाकडून वेळोवेळी घोषित केलेल्या आरोग्य योजना त्या रुग्णालयात सवलतीच्या दरात उपलब्ध आहेत, याची प्रसिद्धी करण्याचेही आदेश आपल्या कार्यालयाकडून निर्गमित करण्यात यावेत. जेणेकरून सर्वसामान्यांना या योजनांचा लाभ मिळेल.

आपला विश्वासू,

डॉ. उदय धुरी,
समन्वयक, आरोग्य साहाय्य समिती,
(संपर्क क्रमांक : 9967671027)

सोबत प्रत माहितीसाठी : धर्मादाय आयुक्त, महाराष्ट्र राज्य यांच्याकडील परिपत्रक क्र. 566, दिनांक 24.9.2019