– मे. प्रतापराव राणे ट्रस्टच्या कारभारावर राज्यस्तरीय समितीचे ताशेरे; दोषींवर कठोर कारवाईची मागणी
DOC-20260806-WA0010. Download
युवा शक्ती एक्सप्रेस वृत्तसेवा, मीरा-भाईंदर :
मीरा-भाईंदर महानगरपालिकेच्या प्राणी जन्म नियंत्रण (Animal Birth Control – ABC) केंद्राचा कारभार किती विस्कळीत आणि ढिसाळ आहे, याची पोलखोल राज्यस्तरीय तज्ज्ञ समितीच्या अहवालातून झाली आहे. केंद्राचा ठेका मिळालेल्या मे. प्रतापराव राणे सामाजिक शैक्षणिक ट्रस्टच्या कामकाजात गंभीर अनियमितता असल्याचे समोर आले असून, यामुळे मुक्या प्राण्यांच्या आरोग्याशी थेट खेळ खेळला जात असल्याचा गंभीर आरोप युवक काँग्रेसचे नेते रवींद्र बाबासाहेब खरात यांनी केला आहे. याप्रकरणी दोषी संस्था आणि संबंधित अधिकाऱ्यांवर तत्काळ कठोर कारवाईची मागणी जोर धरू लागली आहे.
समितीच्या तपासात काय निष्पन्न झाले?
युवक काँग्रेसतर्फे करण्यात आलेल्या तक्रारीची गंभीर दखल घेत, राज्यस्तरीय तज्ज्ञ समितीने २२ जुलै २०२५ रोजी या ABC केंद्राला अचानक भेट देऊन सखोल पाहणी केली. यादरम्यान केंद्रातील औषधसाठा, ऑपरेशन थिएटर, प्राण्यांची देखभाल आणि प्रशासकीय नोंदींची कसून चौकशी करण्यात आली. अहवालातील मुद्दे क्रमांक ११, १३, १४, १५ आणि १७ मधील निष्कर्ष अत्यंत धक्कादायक आहेत:
- विलगीकरण कक्षाचाच पत्ता नाही: संसर्गजन्य आजार असलेल्या प्राण्यांसाठी केंद्रात स्वतंत्र विलगीकरण वॉर्ड (Isolation/Quarantine) उपलब्धच नाही. प्राण्यांच्या आरोग्यासाठी ही अत्यंत प्राथमिक व अनिवार्य अट असतानाही त्याकडे दुर्लक्ष करण्यात आले आहे.
- औषधसाठ्यात मोठी तफावत: औषध साठ्याची नोंदवही नियमांनुसार ठेवलेली आढळली नाही. प्रत्यक्षात उपलब्ध असलेला औषधसाठा आणि नोंदवहीतील आकडेवारी यात जमीन-अस्मानाचा फरक असून नोंदी अत्यंत अस्पष्ट आहेत.
- डॉग कॅच व रिलीज रजिस्टरमध्ये विसंगती: कुत्रे पकडल्याची आणि शस्त्रक्रियेनंतर ते सोडल्याची नोंद एकमेकांशी मेळ खात नाही. विशेष म्हणजे, या नोंदींवर संबंधित पशुवैद्यकीय अधिकाऱ्यांच्या स्वाक्षऱ्याच नसल्याचे उघडकीस आले आहे.
- ऑपरेशन रजिस्टरमधील गोलमाल: मांजरांच्या निर्बिजीकरणाच्या नोंदींमध्येही प्रचंड तफावत असून, प्रत्यक्षात किती प्राण्यांवर कारवाई झाली याची कोणतीही खात्रीशीर आकडेवारी उपलब्ध नाही.
समितीच्या शिफारसी आणि कारवाईची मागणी
केंद्रातील या सर्व त्रुटी जोपर्यंत पूर्णपणे दूर होत नाहीत, तोपर्यंत संबंधित ABC केंद्राचे कामकाज तात्काळ स्थगित (Suspend) करावे, अशी स्पष्ट शिफारस समितीने केली आहे. तसेच सर्व नोंदवह्या अद्ययावत ठेवणे, औषधसाठ्याची अचूक नोंद ठेवणे आणि निरीक्षण समितीची पुनर्रचना करण्याचे निर्देश दिले आहेत.
या संपूर्ण प्रकरणावर संताप व्यक्त करताना रवींद्र बाबासाहेब खरात म्हणाले,
”मी केलेल्या तक्रारीतील प्रत्येक मुद्दा या तज्ज्ञ समितीच्या अहवालात सत्य ठरला आहे. मुक्या प्राण्यांच्या जिवाशी खेळणाऱ्या मे. प्रतापराव राणे ट्रस्टवर, हलगर्जीपणा करणाऱ्या पशुवैद्यकीय अधिकाऱ्यांवर आणि या गैरव्यवहाराला पाठीशी घालणाऱ्यांवर फौजदारी व शिस्तभंगाची कारवाई झाली पाहिजे.”
महापालिकेने हा अहवाल तात्काळ सार्वजनिक करून दोषींवर कायदेशीर बडगा उगारला नाही, तर तीव्र आंदोलन छेडण्यात येईल, असा इशाराही खरात यांनी दिला आहे.