कायद्याच्या चौकटीत राहून सामाजिक सलोखा व पुरोगामी विचारांची जपणूक करण्याचे मान्यवरांचे आवाहन
विरार – विजय काकडे
शनिवार, २४ ऑक्टोबर २०२६ रोजी विरार पूर्व येथील मामा नगर परिसरात ७० वा धम्मचक्र प्रवर्तन दिन सोहळा अत्यंत उत्साहात आणि सामाजिक एकोप्याच्या वातावरणात साजरा करण्यात आला. बौद्धजन पंचायत समिती (शाखा क्रमांक ८३१) आणि माता रमाई महिला मंडळाच्या संयुक्त विद्यमाने या विशेष कार्यक्रमाचे आयोजन करण्यात आले होते.
या कार्यक्रमाला मुख्य वक्ते म्हणून मुंबई उच्च न्यायालयाचे ज्येष्ठ वकील मा. गिरीश दिवाणजी उपस्थित होते. तसेच मा. सुरेश माणचेकर (गट प्रतिनिधी क्र. ३७) व माणुसकी फाउंडेशनचे सचिव मा. राजेश जाधव यांची प्रमुख उपस्थिती होती.
कार्यक्रमादरम्यान ॲड. गिरीश दिवाणजी यांनी “पुणे करार – बहुजनांची हुकलेली एक संधी” या विषयावर उपस्थितांना कायदेशीर, ऐतिहासिक व घटनात्मक संदर्भांसह सविस्तर मार्गदर्शन केले. भारतीय राज्यघटनेने दिलेले अधिकार, कायद्याची चौकट आणि पुरोगामी विचारांची विचारसरणी आत्मसात करून समाजाने शैक्षणिक व सामाजिक प्रगतीकडे वाटचाल कशी करावी, यावर त्यांनी प्रकाश टाकला.
कार्यक्रमात इतर वक्त्यांनीही आपले विचार मांडताना, संविधानाच्या चौकटीत राहून समाजात परस्पर बंधुभाव आणि सामाजिक सलोखा जपणे ही आजच्या काळाची गरज असल्याचे अधोरेखित केले.
स्थानिक संस्था व नागरिकांचा उत्स्फूर्त सहभाग
या सोहळ्यास परिसरातील विविध सामाजिक संस्थांचे प्रतिनिधी आणि नागरिक मोठ्या संख्येने उपस्थित होते. यामध्ये जयमल्हार मामा सेवाभावी संस्थेचे अध्यक्ष मा. विकास पाटील, श्री साईदत्त सेवा मंडळाचे अध्यक्ष मा. प्रकाश डांगे यांच्यासह परिसरातील विविध गृहनिर्माण संस्थांचे पदाधिकारी व रहिवासी उपस्थित होते.
विशेषतः महिलांची उपस्थिती लक्षणीय होती. संपूर्ण कार्यक्रम शांततेत, सौहार्दपूर्ण वातावरणात आणि बौद्ध संस्कृतीच्या पुरोगामी मूल्यांना अनुसरून पार पडला.