वसई | वार्ताहर ःदिवस-रात्र गोंगाट करुन ध्वनी प्रदुषण करणार्‍या अनधिकृत क्रिकेट शेडवर कारवाई करण्यास टाळाटाळ करणार्‍या पालिका अधिकार्‍या विरोधात ग्रामस्थाने आमरण उपोषणास सुरवात केली आहे.
आगाशी ज्योती येथील पाटीलगांव सर्वे.नं.२७ हिस्सा क्र.८ या जागेवर असलेल्या अनधिकृत क्रिकेट शेडमुळे मानसिक त्रास होत असल्याची तक्रार येथील ग्रामस्थ स्टीफन डिसिल्वा यांनी पालिकेकडे केली होती.त्यावर एमआरटीपी ची नोटीस बजावून प्रकरण शांत करण्याचा प्रयत्न पालिकेमार्फत करण्यात आला.त्यानंतर मात्र,कोणतीच कारवाई करण्यात आली नाही.त्यामुळे डिसील्वा यांनी आमरण उपोषणाचा इशारा दिला होता.त्यानुसार १६ डिसेंबरला ते पालिका मुख्यालयात उपोषणासाठी गेल्यावर प्रचंड पोलीस आणि सुरक्षा रक्षकांच्या बंदोबस्तात त्यांना प्रवेशद्वाराजवळच अडवण्यात आले.
त्यांची भेट घेण्याचेही सहाय्यक आयुक्ता हर्षला सावे यांनी टाळले.मात्र,त्यानंतर मध्यस्थी करुन एका पोलीस उपनिरिक्षकाने सावे यांची भेट घेतली.त्यावेळी एमआरटीपी ची नोटीस देण्यात आली असून,मुदत संपल्यानंतर कारवाई करु असे सांगून त्यांनी टाळाटाळ केली.अशा प्रकारे आंदोलन चिरडण्याचा प्रयत्न केल्यामुळे स्टिफन डिसिल्वा यांनी नवे पोलीस आयुक्त मधुकर पांडेय यांच्याकडे तक्रार केली असून,अनधिकृत शेडवर कारवाई न करणार्‍या हर्षला सावे यांची आर्थिक चौकशी करण्याची मागणी त्यांनी केली आहे.