वसई | वार्ताहर ः दिर्घकाळ जबाबदारीच्या प्रतिक्षेत असलेल्या सहाय्यक आयुक्त मोहन संखे यांनी प्रभाग आय चा अधिकार मिळाल्यावर,त्यांनी ६७०० स्क्वे.फुट अनधिकृत बांधकामांवर कारवाई केल्यामुळे अशा बांधकामधारकांचे धाबे दणाणले आहेत.
पेल्हार प्रभाग समितीत सहाय्यक आयुक्त पदाची जबाबदारी पार पाडत असताना,वरिष्ठांच्या कार्याची पोलखोल करणारे मोहन संखे यांच्यावर कारवाई करुन त्यांच्यावर दबाव तंत्राचा वापर करण्यात आला होता.वरिष्ठ अधिकार्यांचा अनधिकृत बांधकामांना वरदहस्त असल्यामुळे त्यावर कारवाई करण्यास अडचणी येत असल्याचे संखे यांनी छातीठोकपणे सांगितले होते.त्यामुळे त्यांची मुख्यालयात बदली करण्यात आली होती. कालांतराने काही दिवसांपुर्वी त्यांच्यावर प्रभाग समिती आय-वसई च्या सहाय्यक आयुक्त पदाची जबाबदारी सोपवण्यात आली.ही जबाबदारी पार पाडताना त्यांनी गुरुवारी नायगांव-उमेला येथील एकूण साडेसहाशे आणि पाचुबंदर येथील २०० फुटांच्या अनधिकृत बांधकामावर जेसीबी फिरवला . तसेच डी मार्ट जवळील खाऊच्या सर्व गाड्या उध्वस्त केल्या. त्यामुळे अनधिकृत बांधकाम करणार्यांचे आणि अवैध फेरीवाल्यांचे धाबे दणाणले आहेत.
