धनीव परिसरात अनधिकृत बांधकामांचा महापूर; बड्या अधिकाऱ्यांच्या भूमिकेवर संशयाची सुई
विशेष प्रतिनिधी, – नालासोपारा
वसई-विरार महानगरपालिकेच्या हद्दीतील धनीव (मौजे धनीव) परिसरात सध्या कायद्याचे धिंडवडे निघत असून, भूमाफिया आणि प्रशासकीय यंत्रणेच्या साट्यालोट्यामुळे अनधिकृत बांधकामांचे पीक जोमाने आले आहे. धनीव बाबा चाळ परिसरात ज्या गतीने सिमेंटचे जंगल उभे राहत आहे, ते पाहता या भागात ‘दुसरे धारावी’ वसवले जात असल्याची चर्चा स्थानिक नागरिकांमध्ये सुरू झाली आहे. या संपूर्ण बेकायदेशीर उद्योगाला महापालिकेतील काही ‘बड्या’ खुर्च्यांचे मूक संमती असल्याचा खळबळजनक आरोप होत आहे.
एकीकडे सामान्य नागरिकाने साधे दुरुस्तीचे काम केले तरी त्यावर तत्काळ हातोडा चालवणारे महापालिका प्रशासन, धनीवमधील या अवाढव्य अनधिकृत संकुलांकडे मात्र पाठ फिरवून बसले आहे. सूत्रांच्या माहितीनुसार, प्रभाग समितीचे काही वरिष्ठ अधिकारी आणि पालिकेतील उच्चपदस्थ यांच्या ‘आशीर्वादा’शिवाय एवढ्या मोठ्या प्रमाणावर जमिनी हडप करणे अशक्य आहे. “अधिकाऱ्यांचे डोळे मिटले आहेत की ‘लक्ष्मी’ दर्शनाने ते दिपून गेले आहेत?” असा जळजळीत सवाल आता करदात्या जनतेतून विचारला जात आहे.
मौजे धनीव येथील काही विशिष्ट सर्वेक्षण क्रमांकांवर रातोरात बांधकामे उभी राहत आहेत. विशेष म्हणजे, तक्रारी होऊनही या ठिकाणी महापालिकेचा बुलडोझर पोहोचत नाही. केवळ कागदोपत्री नोटिसा बजावून प्रशासनाकडून वेळकाढूपणा केला जात असल्याचा संशय आहे. काही अधिकारी तर या माफियांचे ‘एजंट’ म्हणूनच काम करत असल्याच्या चर्चांनी पालिकेच्या गोटात खळबळ माजली आहे. जर या प्रकरणात कोणताही आर्थिक व्यवहार झाला नसेल, तर संबंधित भूखंडांवरील अनधिकृत बांधकामे आजही दिमाखात कशी उभी आहेत, याचे उत्तर देण्यास प्रशासन टाळाटाळ करत आहे.
”सामान्य माणसाला नियमांची जंत्री वाचून दाखवणारे प्रशासन, भूमाफियांच्या पुढे नांगी का टाकते?” असा प्रश्न धनीवमधील त्रस्त नागरिक विचारत आहेत. या भागात ‘डाळीत काळं नसून संपूर्ण डाळच काळी’ असल्याचा प्रत्यय येत आहे. आता महापालिका आयुक्त या भ्रष्ट साखळीचा पर्दाफाश करणार की ‘अर्थपूर्ण’ शांतता पाळणार, याकडे सर्वांचे लक्ष लागले आहे. या अनधिकृत बांधकामांच्या विळख्यातून धनीवची मुक्तता न झाल्यास येथील नागरी सुविधांवर प्रचंड ताण येऊन भविष्यात मोठी समस्या निर्माण होण्याची चिन्हे आहेत.
- अनधिकृत बांधकामांची माहिती असूनही कारवाई का लांबणीवर टाकली जात आहे?
- संबंधित भागातील प्रभाग अधिकाऱ्यांवर अद्याप कारवाई का झाली नाही?
- भूमाफियांना अभय देणाऱ्या ‘पांढरपेशा’ चेहऱ्यांचा शोध कधी लागणार?