विरार – विरार पूर्व येथील कोपरी परिसरातील नित्यानंद धाम या चार मजली इमारतीचा काही भाग मंगळवारी रात्री कोसळून भूमी विनोद पाटील ही पाच वर्षांची चिमुरडी मृत्युमुखी पडली. या दुर्घटनेमुळे विरार, नालासोपारा भागातील जुन्या, अनधिकृत इमारतींचा प्रश्न ऐरणीवर आला आहे.
महायुतीचे उमेदवार प्रदीप शर्मा यांनी जुन्या, अनधिकृत इमारतींतील रहिवाशांना हक्काचा सुरक्षित निवारा मिळावा यासाठीच क्लस्टर योजनेचे सुतोवाच जाहीरनाम्यात केले आहे. ही इमारत कोसळली तेव्हा शर्मा यांची प्रचार रॅली याच भागाकडे सरकत होती. मात्र मदत व बचाव कार्यात अडथळा नको यासाठी शर्मा यांनी रॅली पुढे न नेता मागे वळवली आणि संवेदनशीलतेचे प्रत्यंतर दिले. मृत भूमीला त्यांनी श्रद्धांजली अर्पण केली असून जुन्या इमारतींच्या प्रश्नावर कायमस्वरूपी तोडगा काढण्यास आपले प्राधान्य राहील, असे म्हटले आहे. बचावकार्यात अडथळे नकोत म्हणून त्यांनी दुर्घटनास्थळीही जायचे टाळत प्रसिद्धीलोलूप नेत्यांपेक्षा वेगळ्या दृष्टीकोनाचा प्रत्यय दिला.
विरार पूर्व कोपरी गावातील नित्यानंद नगर परिसरात अनेक अनधिकृत इमारती आहेत. या इमारतींपैकी 10 वर्षे जुन्या नित्यानंद धाम या चार मजली इमारतीचा टेरेस आणि व चौथ्या मजल्यावरील सज्जा रात्री आठच्या सुमारास कोसळला. कोसळलेला भाग इमारतीखालील दुचाकींवर कोसळला. परिणामी वाहनांचे नुकसान झाले. या घटनेत भूमीचा ढिगाऱ्याखाली अडकून मृत्यू झाला.
दुर्घटना घडली त्या वेळी इमारतीच्या चौथ्या मजल्यावर 10 कुटुंब होती. चौथ्या मजल्यावरील भाग कोसळल्याने रहिवाशांना बाहेर पडण्यास अडथळा येत होता, मात्र अग्निशमन दल येण्याआधीच स्थानिक नागरिकांनी बचावकार्याला सुरुवात केली. दरम्यान, शेजारील इमारतसुद्धा कोसळण्याच्या स्थितीत असल्याने या इमारतीतील रहिवाशांनीदेखील तातडीने मोकळ्या मैदानात धाव घेतली.