विरार (पूर्व) : विद्यार्थ्यांमध्ये बालसुरक्षा, सुरक्षित-असुरक्षित स्पर्श आणि लैंगिक अत्याचारापासून स्वसंरक्षणाबाबत जनजागृती निर्माण करण्यासाठी विरार (पूर्व) येथील श्रीमती ताराबाई वर्तक अकादमी (CBSE) मध्ये एका विशेष मार्गदर्शन व्याख्यानमालेचे आयोजन करण्यात आले. शिव विधी व न्याय सेना (आगाशी-विरार), अर्नाळा शिक्षण संस्था आणि संविधान प्रतिष्ठान यांच्या संयुक्त विद्यमाने हा उपक्रम पार पडला.बालवाडी ते इयत्ता पाचवीपर्यंतचे विद्यार्थी आणि त्यांच्या पालकांसाठी आयोजित या कार्यक्रमात सुरक्षेचे धडे देण्यावर विशेष भर देण्यात आला.कार्यक्रमास मुंबई उच्च न्यायालयाच्या अधिवक्त्या तथा शिव विधी व न्याय सेनेच्या महाराष्ट्र उपाध्यक्षा ॲड. स्वप्ना प्रमोद कोदे आणि संविधान प्रतिष्ठानचे सचिव ॲड. गिरीश अरविंद दिवाणजी प्रमुख वक्ते म्हणून लाभले. त्यांच्यासह ॲड. प्रसाद मनोहर ओटवकर आणि ॲड. दीपिका सतीश पाटील यांचीही प्रमुख उपस्थिती होती.
- सोप्या भाषेत सुरक्षित स्पर्शाची ओळख: ॲड. स्वप्ना कोदे यांनी विद्यार्थ्यांना त्यांच्या वयाला साजेसे अशा अत्यंत सोप्या भाषेत ‘गुड टच’ व ‘बॅड टच’ची संकल्पना समजावून सांगितली. नकोसा स्पर्श झाल्यास ठामपणे ‘नाही’ म्हणणे, त्या ठिकाणाहून दूर जाणे आणि तात्काळ विश्वासू व्यक्तीकडे मदत मागणे, याचे महत्त्व त्यांनी स्पष्ट केले.
- कायदेशीर अधिकार व POCSO कायदा: ॲड. गिरीश अरविंद दिवाणजी यांनी संविधानाने बालकांना दिलेले हक्क आणि POCSO (पोक्सो) कायद्याची माहिती दिली. बालकांचे रक्षण करण्यासाठी पालक, शिक्षक व संपूर्ण समाजाची सामूहिक जबाबदारी किती महत्त्वाची आहे, हे त्यांनी उपस्थितांना पटवून दिले.
- व्याख्यानमालेदरम्यान विद्यार्थ्यांच्या मनावर “माझ्या शरीरावर माझा अधिकार” हा विचार ठसवण्यात आला. तसेच कोणत्याही संशयास्पद किंवा असुरक्षित प्रसंगी काय करावे, याचे प्रात्यक्षिकपर मार्गदर्शन करताना खालील मूलमंत्र देण्यात आला:
- NO (नको): नको असलेल्या किंवा असुरक्षित स्पर्शाला ठामपणे नकार देणे.
- GO (जा): त्या धोकादायक किंवा अयोग्य परिस्थितीमधून तात्काळ सुरक्षित ठिकाणी निघून जाणे.
- TELL (सांग): घडलेल्या प्रकाराबद्दल आई-वडील, शिक्षक किंवा इतर विश्वासू व्यक्तीला त्वरित माहिती देणे.
- श्रीमती ताराबाई वर्तक अकादमीचे शिक्षक, शिक्षकेतर कर्मचारी आणि शाळा व्यवस्थापन समितीच्या सदस्यांनी या मोहिमेत सक्रिय सहभाग घेतला. ५०० हून अधिक विद्यार्थी व पालकांनी ऑफलाईन आणि ऑनलाईन माध्यमातून या व्याख्यानमालेचा लाभ घेतला.केवळ कायदेशीर तरतुदींची माहिती देऊन चालत नाही, तर बालकांना स्वतःच्या शरीराबद्दल जागरूक करणे आणि नको असलेल्या स्पर्शाविरुद्ध आवाज उठवण्याचा आत्मविश्वास निर्माण करणे अत्यंत गरजेचे आहे, असा महत्त्वपूर्ण संदेश या यशस्वी उपक्रमातून देण्यात आला.
