वसई-विरारमधील २० प्रमुख उद्योजकांचा सहभाग; महापौर अजीव पाटील यांची पुढाकार
प्रतिनिधी, विरार:
वसई-विरार शहराच्या औद्योगिक आणि व्यावसायिक विकासाला नवी गती देण्यासाठी प्रशासनाने सकारात्मक पाऊल उचलले आहे. शहरातील उद्योजकांना भेडसावणाऱ्या तांत्रिक आणि प्रशासकीय अडचणी सोडवण्यासाठी महापौर अजीव पाटील यांच्या उपस्थितीत २ एप्रिल रोजी एक विशेष बैठक संपन्न झाली. “संवाद आणि योग्य मार्गदर्शनाच्या जोरावर व्यावसायिक समस्यांचे निराकरण करता येईल,” असा विश्वास यावेळी महापौरांनी व्यक्त केला.
या बैठकीला परिसरातील सुमारे २० प्रमुख उद्योजक उपस्थित होते. बैठकीच्या सुरुवातीला उद्योजकांच्या वतीने महापौरांचे पुष्पगुच्छ देऊन स्वागत करण्यात आले. शहराच्या अर्थव्यवस्थेत महत्त्वाचा वाटा असलेल्या उद्योग क्षेत्रातील अडचणी समजून घेण्यासाठी महापौरांनी वेळ दिल्याबद्दल उद्योजकांनी त्यांचे आभार मानले.
उद्योजकांच्या समस्यांना मिळणार ‘बूस्ट’
सदिच्छा भेटीच्या स्वरूपात झालेल्या या चर्चेत महापौरांनी अत्यंत सकारात्मक भूमिका घेतली. आपल्या विभागात नेमके कोणकोणते उद्योग कार्यरत आहेत, त्यांच्या दैनंदिन कामकाजात कोणत्या पायाभूत किंवा प्रशासकीय समस्या उद्भवतात आणि भविष्यातील गरजा काय आहेत, याची सविस्तर माहिती त्यांनी जाणून घेतली. केवळ समस्या ऐकून न थांबता, अजीव पाटील यांनी संबंधित विभागांच्या अधिकाऱ्यांशी उद्योजकांचा थेट संपर्क साधून दिला. यामुळे अनेक प्रलंबित तांत्रिक विषयांवर तात्काळ मार्गदर्शनाची दिशा स्पष्ट झाली.
व्यापारासाठी पोषक वातावरण
महापौरांच्या या तत्परतेमुळे उद्योजकांमध्ये समाधानाचे वातावरण आहे. प्रशासकीय स्तरावर मिळणाऱ्या या सहकार्यामुळे वसई-विरारमध्ये नवीन व्यवसायांच्या संधी निर्माण होतील आणि स्थानिक व्यापाराला मोठी चालना मिळेल, अशी अपेक्षा व्यक्त केली जात आहे. आगामी काळात येथील उद्योग क्षेत्र अधिक सक्षम करण्याच्या दृष्टीने ही बैठक मैलाचा दगड ठरणार असल्याचे बोलले जात आहे.
“शहराच्या विकासात उद्योजकांचे योगदान मोठे आहे. त्यांच्या समस्यांचे निराकरण करून त्यांना प्रशासकीय स्तरावर आवश्यक ते सहकार्य करणे ही आमची जबाबदारी आहे. या संवादामुळे उद्योगांच्या प्रगतीचा मार्ग मोकळा होईल.”
— अजीव पाटील, महापौर (वविमपा)