प्रतिनिधी : वसीम अहमद शेख
नालासोपारा (पूर्व):
भारतीय राज्यघटनेचे शिल्पकार भारतरत्न डॉ. बाबासाहेब आंबेडकर यांची जयंती नालासोपारा पूर्वेतील धनु बाग परिसरात अत्यंत उत्साहात आणि सामाजिक समरसतेच्या वातावरणात साजरी करण्यात आली. या सोहळ्याचे वैशिष्ट्य म्हणजे, मुस्लिम बांधवांनी मोठ्या संख्येने उपस्थित राहून बाबासाहेबांना अभिवादन केले, ज्यामुळे परिसरात सामाजिक एकता आणि बंधुभावाचा एक नवा आदर्श निर्माण झाला आहे.
सामाजिक सलोख्याचा जागर:-वसई-विरार जिल्हा काँग्रेस कमिटीचे युवा उपाध्यक्ष आणि आस्था शक्ती सेवा संस्था, महाराष्ट्रचे अध्यक्ष संदीप कनौजिया यांच्या मार्गदर्शनाखाली धनु बाग येथील काँग्रेस कार्यालयाजवळ हा भव्य कार्यक्रम आयोजित करण्यात आला होता. कार्यक्रमाच्या प्रारंभी डॉ. बाबासाहेब आंबेडकर यांच्या प्रतिमेस पुष्पहार अर्पण करून अभिवादन करण्यात आले. यावेळी उपस्थितांनी बाबासाहेबांच्या विचारांवर चालण्याचा संकल्प केला.
बालगोपाळांचा उत्साह आणि जनसहभाग:- जयंतीचे औचित्य साधून स्थानिक मुलांमध्ये बिस्किटे आणि चॉकलेटचे वाटप करण्यात आले. यानिमित्ताने मुलांच्या चेहऱ्यावरील आनंद सोहळ्याचा उत्साह द्विगुणित करणारा ठरला. केवळ पुरुषच नव्हे, तर महिलांनीही या कार्यक्रमात हिरिरीने सहभाग नोंदवून संविधानाने दिलेल्या समानतेच्या मूल्यांचा जागर केला.
एकतेचा संदेश:- आजच्या बदलत्या सामाजिक परिस्थितीत हा सोहळा केवळ एक उत्सव न राहता, तो विविध धर्मांच्या एकतेचा दुवा ठरला. मुस्लिम समाजाच्या सक्रिय सहभागामुळे “शोषित आणि वंचितांसाठी लढा देणारे बाबासाहेब हे केवळ एका समाजाचे नसून संपूर्ण मानवतेचे कैवारी होते,” हा पुरोगामी संदेश पुन्हा एकदा अधोरेखित झाला.
याप्रसंगी विविध राजकीय आणि सामाजिक संघटनांचे पदाधिकारी, कार्यकर्ते आणि स्थानिक नागरिक मोठ्या संख्येने उपस्थित होते. लोकशाही मूल्यांचे जतन आणि सामाजिक सलोखा वृद्धिंगत करण्याच्या उद्देशाने पार पडलेला हा सोहळा नालासोपारा परिसरात चर्चेचा विषय ठरला आहे.
