सातपाटी प्राथमिक आरोग्य केंद्रातून उपचार घेतलेल्या एका रुग्णाला उपचार केल्याबाबत वैद्यकीय प्रमाणपत्रासाठी पैशाची मागणी केल्याचा प्रकार उघडकीस आला आहे. रुग्णाने पैशाची पूर्तता केली नाही म्हणून रागाने आरोग्य केंद्रातील आरोग्य अधिकारी डॉ. किशोर गुलाले यांनी वैद्यकीय प्रमाणपत्र तयार करून रुग्ण समोरच फाडल्याचा गंभीर प्रकार केला आहे.
घडलेल्या प्रकारानंतर सातपाटी येथील रुग्ण निमेत आरेकर यांनी जिल्हा परिषदेचे मुख्य कार्यकारी, अधिकारी जिल्हा आरोग्य अधिकारी यांच्याकडे लेखी तक्रार देऊन संबंधित वैद्यकीय अधिकाऱ्यावर शासकीय सेवेचा भंग केल्याप्रकरणी कारवाईची मागणी केली आहे. निमेत याचा 1 जानेवारी रोजी दुचाकीच्या अपघातात पायाला जखम झाली होती. या अपघातावर त्यांनी सातपाटीच्या प्राथमिक आरोग्य केंद्रात उपचार घेतले. तिथे उपस्थित असलेल्या आरोग्य अधिकाऱ्यांनी त्याच्यावर उपचार करून त्याला आठवडाभराच्या औषधोपचार दिला व घरी आराम करण्याचा सल्ला दिला. यादरम्यान तो कामावर जात असलेल्या ठिकाणी कामावर जाऊ शकला नाही त्यानंतर निर्मात्याला कामावर जाण्यासाठी वैद्यकीय प्रमाणपत्र देणे आवश्यक होते त्यानंतरच त्याला कामावर घेतले जाणार होते. यासाठी त्याने रविवारी आरोग्य केंद्रात जाऊन आरोग्य अधिकारी डॉ. किशोर गूलाले यांच्याकडून वैद्यकीय प्रमाणपत्राची मागणी केली या प्रमाणपत्राची मागणी केल्यानंतर गूलाले यांनी प्रमाणपत्र तयार करून पैशांची मागणी केली
पैशाची मागणी केल्यानंतर निमेत यांनी त्यांच्या काकांना फोनवरून संपर्क साधला आणि संबंधित डॉक्टरशी बोलण्याची विनंती केली. त्यावेळी काकांनी शासकीय शुल्क किती आहे ते सांगा म्हणजे तो तेवढी रक्कम भरेल असे सांगितले. या गोष्टीचा राग धरून संबंधित गुलाले यांनी तयार केलेले प्रमाणपत्र फाडून टाकले आणि अशी प्रमाणपत्रे द्यायला आम्ही बांधील नाहीत असे बेजबाबदार वक्तव्य केले. त्यामुळे गुलाले यांचा बेजबाबदारपणा समोर आला या बेजबाबदारपणामुळे नागरिकांशी चुकीच्या पद्धतीने वागणूक दिल्यामुळे त्यांच्या विरोधात विविध ठिकाणी तक्रार दाखल करण्यात आली आहे.
● नागरिकांच्या आरोग्य सेवेसाठी नेमलेले आरोग्य अधिकारी यांची वागणूक लज्जास्पद होती त्यांनी केलेले कृत्य बेजबाबदार व अशोभनीय होते त्यांच्यावर शासकीय सेवा हक्कभंग अंतर्गत कारवाई व्हावी अशी माझी मागणी राहिली.
निमेत आरेकर,रुग्ण,सातपाटी
● आरोग्य केंद्रातील इतर आरोग्य अधिकारी यांनी रुग्णसेवा दिली आहे. संबंधित रुग्णाला मला वैद्यकीय प्रमाणपत्र देण्याचा अधिकार नव्हता म्हणून तयार केलेले प्रमाणपत्र फाडले.
डॉ.किशोर गुलाले,आरोग्य अधिकारी, सातपाटी आरोग्य केंद्र
● यासंबंधीची तक्रार प्राप्त झाल्यानंतर संबंधित आरोग्य अधिकारी यांच्याकडे खुलासा मागवून घेण्यात येईल.
सिद्धाराम सालीमठ, मुख्य कार्यकारी अधिकारी जिल्हा परिषद पालघर